كل ماتهرب منه ملاقيك

المستحيل 

كيف يثق الانسان بنفسه وكلامه ومبادئه لما كل شي حوله يثبت له انه قابل للتعديل للعجن للكسر للتغيير، كم مره كنت تتحدث بكل ثقه عن موضوع لا يمكن انك تتساهل فيه اياً كان الشخص او موقف من المستحيل انك تنحط فيه او طريقة حياه مستحيلللل انك تعيشها او تجربه قلت لنفسك الفين مره انك ماراح تخوضها، مع معرفتك بأن كل شي تحاول الهرب منه ملاقيك لا محاله 

كيف ترجع لنفسك بعد ما قدرت بلحظات سريعه انك تكسر كل هالقواعد وتحقق المستحيل؟  بتزعل، بتقول لنفسك ليش سويت كذا وش كان حادني بتبدأ تلوم نفسك وتشكك بكل شي اعتقدت انك عارفه بتتوتر وتعصب بتتذكر كلامك قبل.. واحتمال تعصب زياده 

تبدأ تفكر بالأمور اللي أرغمتك عليها، بتعطي نفسك اعذار بتدور لك مبررات بتحاول تقنع نفسك وبأسوأ الاحوال / اللي حولك بجميع الطرق انك ماسويت هالشي من فراغ ومبادئك وكل شي عنك للحين مقتنع فيها وان اللي صار ذا مره وحده وانتهى وعدى، والمطلوب منك انك تنسسسى خلاص وتكمل حياتك طبيعي

لكن وسط هذا كله ناسي انك انسان قادر تغير شخصيتك قناعاتك حياتك كلها بيوم وليله ، ما يمنع انك تحافظ على الاشياء الرئيسيه واللي تحبها بشخصيتك لكن بنفس الوقت رحب بالتغيير (المستحيل) غامر واغلط وتعلم  وعيش! احيانا انك تقدم على (المستحيل) هو افضل قرار تتخذه نحو حياه  لطالما تمنيتها

..ارجوكم لا تعيشون وفق قوانين وضعتوها على انفسكم منذ عشرات السنين

جربوا فالتجربة خير برهان

بعد منتصف الليل