الألفة والتألف

نظرية الخيط الأحمر 

طول عمري اتسأل كيف تعرفت على الأشخاص بحياتي هل اخترتهم أو هم اختاروني ليش قررنا ان علاقتنا تستمر ووش خلانا نبي نتعرف على بعض اكثر، وش اللي يخليها تبقى مثل ماهي أو وش يخليها تتغير أو …… تنقطع   

بحكم إني من الناس اللي مايؤمنون " بالصدف " وبكل صراحه اعتبرها خرافه وان كلمة صدفه طلعت لان البشر مالقوا تفسير للأشياء اللي تصير بحياتهم فبدال مايقعدون يحللون كل موقف غريب/ غير مفهوم / خارق عن الطبيعه يواجههم قرروا يقولون انها مجرد (صدفه) عشان يكملون حياتهم بدون وجع راس وتفكير … منطقي صح ؟ 

بناء على ذلك اؤمن ان الأشخاص اللي مروا بحياتي لا يمكن يكونون عشوائيين فيه سبب إني قابلتهم فيه سبب إننا تقابلنا بذاك اليوم وهذاك التاريخ وهذيك الساعه بالتحديد … 

وعلى هذا الأساس اؤمن بأن الأشخاص اللي بحياتنا هم دروس وتجربه بتغير طريقة تفكيرنا بطريقه أو بأخرى، و ١٠٠% بتاخذ منهم معلومه كنت تتسأل عنها لفتره طويله نظره ، كلمه، موقف بسيط ممكن يكون جواب لسؤال يراودك سنين 

وقيسوها على أشياء كثير

واشوف ان الصداقات فيها عنصر مهم وهو الاختبار وغالباً أحسه نابع من محبه لا اكثر، يختبر معزته عندك، لو صارحك بكل شجاعه شلون بتكون ردة فعلك، شلون بتتصرف لو طلبك خدمه ؟   يتصرف بشكل مختلف، غبي، لامبالي، يعصب، يستهبل، يتدلع، وهو يتمنى بس انك تتقبله بكل شخصياته 

وأنك تتقبل الشخص مثل ماهو وتحبه بكل عيوبه ومحاسنه وماتحاول تغيره بأي طريقه كانت    هي اعلى درجات الحب 

نألف الأشخاص … مو بالساعات اللي نقضيها سوا ولا عدد السنين اللي نعرف بعض فيها ولا بالاسرار اللي امنا بعض عليها

 بل بمحاولة فهمنا لبعض بشكل مستمر وإدراك أننا قابلين للتغيير كل يوم لكن مايمنع اننا نحبهم ونتقبلهم بكل الفصول ونحبهم لأنهم هم